#сылнымутаршаш

Шыже пӱртӱсын моторлыкшым ончен, Ольга Кутасован

"Шыже сӱан" почеламутшым лудын лекташ темлена.



Ял мучашке лектам шыже кечын,

Шӧртньӧ тӱс йымыктарыш шинчам.

Кожла веке ончем куаналын,

Да ваштар пушеҥгем кычалам.

Тӱрлӧ тӱс ден моторын волгалтын,

Шыжын уло чевержым поген.

Вич лукан лышташлаж дене модын,

Шога эр ӱжарала йолген.

А пеленже куэ моторештын,

Кечыла шӧртньӧ тӱсым шавен.

Укш лоҥгаште мардеж, эркын модын,

Лышташ-влакым шыман тарватен.

Пуйто нуно кожласе аланыш

Ӱдыр-качыла, кидым кучен,

Лектылденыт вет шыже сӱаныш,

Сылне тӱсышт дене йолгыктен.

А пеленышт - сӱанвате-шамыч:

Мотор пызле аршашым сакен,

Поланвондо чевер вургем дене-

Ковыртатыл шогат кугешнен.

Тӱмыр-шӱвыр - лышташ кожгыкта,

Сӱан муро - мардеж шӱшкалта.

Тыгай сылне сӱаным ужаш

Ӱжам тыйым пӱртӱсыш, йолташ.