Куштылго атлетике

Куштылго атлетике

Самырык тукымлан пример

Эртыше каныш кечылаште республикнан тӱрлӧ кундемыштыже спортын тӱрлӧ видше дене таҥасымаш, турнир-влак эртаралтыныт.



Мутлан, Шернур посёлкышто Ахтямовмыт еш приз верч таҥасымашке Киров кундем, Йошкар-Ола, Озаҥ, Зеленодольск, Чебоксар гыч кокшӱдӧ утла кумылан еҥ ушнен. Тудо тыгак Кугу Отечественный сарыште сеҥымылан 79 ий теммылан пӧлеклалтын.

Тыгай сынан турнир тиде кундемыште кумшо гана эртаралтын. Таза илыш-йӱлам кучышо, куржталмашым йӧратыше-влакым йӱштӧ игечат лӱдыктен огыл.

– Тений пробегым «Сернурская десятка» манынна. Тидыже лу километр кутыш дене кылдалтын. Самырык тукымымат физкультурлан кумылаҥдыме амал дене программыш 2 ден 5 километрым ешаренна, – ойла таҥасымашын организаторжо-влак кокла гыч иктыже Алексей Ахтямов. – Шернур район администраций вуйлатыше Александр Кугергинлан кугу тау. Полыш улмым шижат гын, умбакыжат поро пашам ышташ кумыл лектеш.

Куандара: куржталаш йӧратыше-влак дене пырля элнан сборный командыжын тале спортсменже-влакат вийыштым тергеныт: тӱнямбал кӱкшытан спорт мастер Людмила Лебедева, шукерте огыл Россий кубокын озаже лийше Ольга Прядкина, Россий первенствын сеҥышыже Андрей Мошкин да молат. Морко кундем гыч куштылго атлетике дене СССР-ын спорт мастерже Валериан Романоват шукыштлан пример лийын.

Алексей – шкежат тале спортсмен, Йошкар-Оласе пелемарафонын сеҥышыже, сандене дистанцийыште шокшо таҥасымаш лийын.

Ӱдырамаш-влак коклаште икымше верыш Людмила Лебедева, а пӧръеҥ-шамыч коклаште Озаҥ ола гыч Фазыл Хусаенов лектыныт.

Е.Эшкинина

А.Антоновын фотожо