Шарнымаш кас Тый улат мыланем

#Лоскутовская_библиотека@bibl_sernurШарнымаш кас «Тый улат мыланем…»

Таче Лоскутово книгагудышто моло кече дечын ойыртемалтше лийын. Тушто эр годсек марий муро йоҥген. Тидлан амалжат лийын. Василий Павловын шарналтен «Тый улат мыланем…» вашлиймашке погыненыт. Ила гын, 15 апрельыште Василий Павлов 65 ийым тема ыле.

Вашлиймашке Василий Павловын шочмо акаже Нина Николаевна Павлова, Овдасола ялын талантан шочшышт-влак, Нина Дмитриевна Лепешкина дене Вениамин Владимирович Семёнов толыныт. Пайремнам Василий Павловын репертуарже гыч «Ныжыл йӱр» муро дене Семенов В.В. почо. Книгагудын озаже Гареева Э..Я., кӱчыкын Василий Павловын илыш корныж дене палдарыш. Нина акаже йоча годсо илышыж гыч Васлийым порын шарналтыш, еш илышыж дене палдарыш. Нина Дмитриевна Василий Павловын койыш-шоктыж нерген каласкален да самырык годсо оҥай историй-влакым шарналтен. «Марий шӱлышан айдеме, волгыдо йӧратымашлан ӱшаныше да шке калыкшым да йӱлажым арален моштышо» - тыге иктешлын шке мутшым Нина Дмитриевна. Тыгак тудо шке возымо книгаже-влак дене палдарен. Ик сылнемутшым йӱкынак йоҥгалтарен пуыш. Книгаже-влакым книгагудо лудшо-влаклан пӧлеклен кодыш. Нина Дмитриевнан возымо «Шошо толын» почеламутшылан Вениамин Владимрович семым келыштарен. Тиде мурым, гитар почеш, сылнын йоҥалтарен пуыш. Вашлиймашым тыгак Лоскутово клубын самодеятельный ансамбльыш коштшо коллективше, Василий Павловын репертуарже гыч «Пӱгыр ломбо» мурыж дене сӧрастарен. «Кузе мый тыйым йӧратем» мурыжо Яковлева В.И. ден Семенов В.В. коктын йоҥгалтарымышт, чылаштын чоныштым тарватыш. Мучашлан Вениамин Владимирович пеш сай пӧлекым ыштыш. Шкенжын возымо «Сорта тул» мурыжлан, каласен кодыман, тиде мурым икымше гана калыкыш луктын, (мыланна тидын дене кугешнаш веле кодеш), да акым шындаш йодын. Ме чылан ик ой дене, Василий Павловын «Вот это да! Вот это вещь!», шомакше дене акым шындышна.

Вашлиймашна пешак тӱвыргӧ лектышан лие. Книгагудын озаже семын, кӧ шарнымашышке ушнен, чылалан пеш кугу тау мутым ойлем! Вес ганат мемнан деке толашда кумылда лекше.