2025-ше ий 6-шо апрельыште, рушарнян, Шернурысо А

2025-ше ий 6-шо апрельыште, рушарнян, Шернурысо А. Ф. Конаков лӱмеш тоштерыште Шернур районысо "Марий кумалтыш" общинысе Кугу Кугыза-влакын ("Совет старейшин") погынымашышт эртен. Тыште 2025 - ше ийлан Кугу Кугыза-влак погынын паша планжым пеҥгыдемденыт. Поснак кугу тӱткышым кӱсото-влакым арун кучымылан ойыреныт. В. М. Мамаев идалыкыште 365 кече уло, садлан онапу йыр тынар кумдыкымак моткоч арун кучыман манын каласыш. Тидын шотышто, Кугу Кугыза-влак каҥашымеке, тыгай пунчалмутым ик ой дене пеҥгыдемденыт. Тыгак онаеҥын теркупшыжо нергенат пунчалым луктыныт: марий кумалтыш тамган теркупшым общинысе онаеҥ-влак веле нумалын кертыт.
Онаеҥ-влак калык деч пурышо йодыш-влакымат, общинылан 21 ий темме кечымат кузе палемдышаш нерген каҥашеныт.